Tromsøhoodie – Marianne ser ut som Kenny frå South Park

Posted on 2. mars 20212. mars 2021 by Ull utan tull

Då eg spøta Villmarksgenseren oppdaga eg at det var ein trend. Ikkje berre innan friluftsliv- og hundekøyrarmiljøet, men generelt blant folk. Og som om ikkje det var nok, så har eg kasta meg på enno ein trend: Tromsøhoodie! Denne gongen med vitande og vilje. Eg tenkte nemleg at ein balaklava slik som Tromsøhoodie ville vera ganske så greit å ha under anorakkhetta på fjellet.

Og det er stikkordfrasen her: Under anorakkhetta på fjellet! For aldri om eg har tenkt å syna meg i sivilisertet strøk med denne hua. Eg ser ut som Kenny frå South Park. Alternativt ein gjennomsnittleg treåring på veg til barnehagen på vinterstid.

Eg burde gjort litt meir undersøkingar då eg kasta meg på barnehagehuetilvaksnetrenden. Det er greit at oppskrifta er gratis. Men passforma er heilt ubrukeleg for meg. Eg endra strikkefasthet på forsøk nummer to og då vart det litt betre. Det eg burde gjort etter forsøk ein, var å finna ei anna oppskrift med betre passform. Det er ikkje ukjent at eg er ein smule lat, så er orka ikkje rekka opp att heile hua for andre gong og så starta på ein heilt ny balaklava. På fjellet er det Function over Fashion!

Marianne si barnehagehue

Beige tromsøhoodie ligg i snøen — Tromsøhoodie

Marianne sit i snøen med ein beige tromsøhoodie og grøn jakke — Barnehagelookalike

Marianne sit i snøen med grøn anorakk og hetta over ein beige tromsøhoodie — Genial under hetta

Vinterferie

Eg tok bileta av Tromsøhoodien då me var på vinterferie. Ein vinterferie som kan oppsummerast med mykje vêr. Det starta med tjukk skodd og mildvêr og gjekk så over til mildvêr og mykje vind. Heldigvis kom sola i sluttten av veka så det var ikkje berre trasig. Hytta ligg ganske i ly sjølv om det bles godt i fjellet. Det var fine, sløve utedagar med aking og bålpanne ved hytta, trugeturar, bål i fjellet og skiturar. Må heller ikkje gløyma den viktigaste av alle hytteaktivitetar: Brettspel på kveldane.

to på fjelltur i tjukk skodde — Ferien starta med skodde

Gut som klatrar på hyttetak dekka av snø — Hopping frå taket

Brettspelet The Pet Cemetery på eit bord — The Pet Cemetery var stor suksess

Gut sit på ryggen til faren og akar nedover — Aking utafor hytta

Skotsk hjortehund med rosa dekken og raude sokkar ligg på tepper ute i snøen — Nanna må og vera med på sløving

Kaffikjelen heng over eit bål — Bålkaffi ved hytta

Metallkopp med kaffi og fargerikt spøt i snøen — Spøtet er som vanleg med

marianne sit med hue, vottar og grøn jakke og drikk kaffi ute på fjellet — Tur med bål og kaffi

Gut går fiskebein på ski oppover fjellsida i strålande sol — Opp Bugrovfjellet. Sikksakk er for pingler

Sol, blå himmel og skispor innover fjellet — Bugrovfjellet

Blå himmel og skuterspor i snøen — Gjekk i ly for vinden innover dalen

To stk på skitur innover fjellet i sol — Sol og kuling

Blå himmel og sol over snøkledde fjell med skispor — Bugrovfjellet

Familie står i sola og diskuterer om turen er slutt — Ferien vart avslutta med trugetur i sola

Barnehagehue for vaksne

Mønster: Tromsøhoodie
Garn: Malsens Tweed, farge beige
Pinnar: 5,0 mm
Garnmengd: 113 gram
Meter garn: 181 meter
Designar: Christina Gjertsen/Slow Knitwear

Til sitt bruk, så er dette ei grei hue. Men eg skulle undersøkt betre og funne eit anna mønster med betre passform for meg. Oppskrifta er gratis og kan lastast ned her.